”اساں قیدی تخت لہور دے“کس دور وچ ایہہ نعرہ گونجدارہیا،شاہ محمود قریشی
بہاولپور وچ پی ڈی ایم دے شو وچ پاور نہیں سی،میں ایس نوں پاور شونہیں آکھاں گا، وزیر خارجہ
ملتان (بیورو رپورٹ)وزیر خارجہ شاہ محمود قریشی داآکھنا اے کہ پچھلے روز بہاولپور وچ پی ڈی ایم دے شو وچ پاور نہیں سی، ایس لئی ایس نوں پاور شو نہیں آکھاں گا۔ تفصیلات دے مطابق ملتان توں جاری کردہ اک بیان وچ وزیر خارجہ شاہ محمود قریشی داآکھنا سی کہ مریم نواز نے آکھیا جنوبی پنجاب نوں محروم رکھیا گیا تے دیکھنا ایہہ وی ہووے گا کہ جنوبی پنجاب نوں محروم کس نے رکھیا۔
شاہ محمود قریشی ہوراں نے آکھیا اے ”اساں قیدی تخت لہور دے“کس دور وچ ایہہ نعرہ گونجدارہیا، پچھلی کئی دہائیاں توں پنجا بوچ کہدی سرکار سی کس دے دور وچ جنوبی پنجاب دے فنڈ ز لہور شفٹ ہوئے۔ ایہناں داآکھنا سی کہ تحریک انصاف نے اختیارات دی نچلی سطح اتے منتقلی کردیاں ہویاں ملتان تے بہاولپور وچ دو سیکرٹیریٹ قائم کیتے نیں جنوبی پنجاب دے فنڈز جنوبی پنجاب وچ ای خرچ کیتے جارہے نیں۔وزیر خارجہ شاہ محمود قریشی نے مزیدآکھیا اے کہ اسیں شروع توں ای آکھ رہے آں کہ بھارت دے بیانیہ دے نال جہڑی آواز مطابقت رکھدی ہووے ایس آواز نے قوم دی کیہ خدمت کرنی اے۔ بھارت آئے روز کنٹرول لائن دی خلاف ورزی کر رہیا اے۔
