حمزہ شہباز کیس وچ جہڑے حقائق ساہمنے آئے اوہ شرمناک نیں: سپریم کورٹ
اسلام آباد( پنجابی میڈیا گروپ) سپریم کورٹ نے حمزہ شہباز ضمانت کیس وچ ریمارکس دتے کیس وچ جہڑے حقائق ساہمنے آئے نیں اوہ شرمناک نیں۔ سپریم کورٹ وچ حمزہ شہباز دی درخواست ضمانت تے سماعت ہوئی۔ سپریم کورٹ نے احتساب عدالت توں جواب طلب کر لیا کہ حمزہ شہباز دا ٹرائل کدوں تک مکمل ہووے گا؟ حمزہ شہباز دے وکیل اعظم نذیر تارڑ نے آکھیا حمزہ شہباز اک سال 7مہینے توں جیل وچ نیں۔ جسٹس مشیر عالم آکھیا میرٹ تے گل نہ کرو تے بہتر اے، کیس وچ جہڑے حقائق ساہمنے آئے نیں اوہ شرمناک نیں، ٹرائل دی سطح تے ک وئی آبزرویشن نہیں دینا چاہندے۔ جسٹس یحییٰ آفریدی نے ریمارکس دتے حمزہ شہباز کیس چلن تے مطمئن نیں تے کیہ مسئلہ اے؟ ٹرائل مکمل ہون تک ملزم نوں جیل وچ رکھنا وی مناسب نہیں، ایہ وی چنگا نہیں کہ پرانے مقدمے چھڈ کے نویں کیسز پہلے چلائے جاؤن جہڑا ملزم پیش نہ ہووے نیب اوہدی ضمانت منسوخی لئی رجوع کرے۔ نیب پراسیکیوٹر نے موقف اختیار کیتا ملک بھر وچ 30نویں احتساب عدالتاں بن رہیاں نیں، نویاں عدالتاں دے قیام نال مقدمیاں دا بھار تقسیم ہووے گا، اک دن وچ پنج توں دس گواہواں دے بیانات ریکارڈ ہوندے نیں۔عدالت نے ہور سماعت دو ہفتے تک ملتوی کر دتی۔
