خواجہ آصف دا بے نامی دار ملازم لبھ لیا اے، نیب دا دعویٰ

لہور( پنجابی میڈیا گروپ) نیب دا کہنا اے خواجہ آصف نے اپنے ملازم طارق میر نوں اپنی کمپنی دا 50فیصد دا مالک بنا رکھیا اے۔ نیب لہور دی تحقیقاتی ٹیم نے مسلم لیگ (ن) دے سینئر رہنما خواجہ آصف دے بے نامی دار ملازم نوں لبھ لیا اے تے نیب ذرائع دا کہنا اے خواجہ آصف نے اپنے ملازم طارق میر نوں اپنی کمپنی دا 50فیصد دا مالک بنا رکھیا اے۔ذرائع دے مطابق خواجہ آصف نے اپنے ملازم طارق میر دے ناں تے 2009 وچ کمپنی رجسٹرڈ کروائی، کمپنی دے باقی 50فیصد شیئرز مسرت خواجہ دے ناں تے نیں، ایم ایس طارق میر دے اکاؤنٹ وچ 9ورھیاں وچ کروڑاں روپے جمع ہوئے، 2009توں 2018تک کمپنی وچ 50کروڑ 70لکھ جمع ہوئے، ایہ فرم لوکل مارکیٹ توں چاول خرید کے بیرون ملک ایکسپورٹ کردی سی۔ نیب ذرائع دا کہنا اے خواجہ آصف دے ملازم طارق میر نوں اوہناں دے ساہمنے بٹھا کے تفتیش کیتی جائے گی، خواجہ آصف توں پچھیا جائے گا اینی بھاری رقماں کیہنے تے کیوں جمع کروائیاں عدم تعاون دی صورت وچ طارق میر نوں گرفتار وی کیتا جا سکدا اے۔