پی ڈی ایم دی راولپنڈی آؤن دی کوئی وجہ نہیں، آؤن والیاں نوں چاء پانی پیاواں گے: ترجمان پاک فوج

راولپنڈی: میجر جنرل بابر افتخار آکھیا اے فوج دے خلاف بولن والیاں نوں جواب دین دی لوڑ نہیں، کیوں جے ایہناں وچ صداقت نہیں، پی ڈی ایم دی راولپنڈی آؤن دی کوئی وجہ نہیں، راولپنڈی آؤن والیاں نوں چاء پانی پیاواں گے، پاک فوج دا مورال ہائی، اپنا کم کر رہی اے، آرمی چیف ایس ہفتے کوئٹہ جاؤن گے۔ڈی جی آئی ایس پی آر میجر جنرل بابر افتخار نے میڈیا بریفنگ دیندیاں آکھیا اے پچھلی اک دہائی توں سکیورٹی چیلنجاں دا ساہمنا اے، ایل او سی تے بھارتی اشتعال انگیزیاں جاری نیں، ایس ورھے کورونا، معیشت، سکیورٹی مسئلیاں دا ساہمنا رہیا، کورونا صورتحال نے معاشی و غذائی صورتحال نوں خطرے وچ پا دتا۔میجر جنرل بابر افتخار دا کہنا سی اندرونی تے بیرونی خطریاں دا بہادری دے نال مقابلہ کیتا، دہشت گردی دے خلاف کامیاب آپریشن کیتے گئے، آپریشن ردالفساد وچ 3لکھ 71ہزار توں ودھ آپریشن کیتے، دہشت گردی دے خلاف آپریشن نال سکیورٹی صورتحال مجموعی طور تے بہتر ہوئی، خودکش حملیاں وچ 97فیصد واضح کمی آئی، اج سارے قبائلی علاقے خیبر پختونخوا دا حصہ نیں۔ ڈی جی آئی ایس پی آرآکھیا کراچی وچ دہشت گردی وچ 95فیصد کمی آئی، کراچی وچ اغوا برائے تاوان وچ 98فیصد کمی آئی، کراچی دا کرائم انڈیکس چھویں نمبر تے سی، ہن 103اُتے اے، سرحدی علاقے وچ دہشت گردی 55فیصد گھٹ ہو گئی۔میجر جنرل بابر افتخار نے ہور آکھیا سانوں بھارتی اشتعال انگیزیاں دا ساہمنا اے، بھارت نہیں چاہندا پاکستان پرامن تے ترقی دی راہ تے گامزن ہووے، مشرقی سرحد تے بھارتی اشتعال انگیزی وچ وادھا ہویا، بھارتی افواج دانستہ طور تے شہری آبادی نوں نشانہ بنا رہیاں نیں، پاک فوج نے بھارتی خلاف ورزیاں دا ہمیشہ بھرپور جواب دتا، بھارت نے 2019وچ سب توں ودھ سیز فائر معاہدے دی خلاف ورزیاں کیتیاں۔

اپنا تبصرہ گھلو