جاپان نے مشکل حالات وچ ہمیشہ پاکستان دی مدد کیتی: شیخ رشید
اسلام آباد( پنجابی میڈیا گروپ) وزیر داخلہ شیخ رشید آکھیا اے پاکستان تے جاپان وچکار دیرینہ تعلقات استوار نیں، جاپان نے مشکل حالات وچ وی ہمیشہ پاکستان دی مدد کیتی اے۔ تفصیل دے مطا بق وزیر داخلہ شیخ رشید نال پاکستان وچ جاپان دے سفیر کینو نوری متسودا نے ملاقات کیتی جہدے وچ دوواں ملکاں وچکار تعلقات دے فروغ تے باہمی دلچسپی دے دوجے امور تے گل بات کیتی گئی۔ وزارت داخلہ ولوں جاری بیان دے مطابق وزیر داخلہ شیخ رشید نے پاکستان دی اقتصادی تے سماجی ترقی وچ جاپان دے کردار دی تعریف کیتی۔ اوہناں آکھیا کورونا دی وباء دے خلاف مدد تے جاپان دی حکومت دے شکر گزار آں۔ جاپان دے سفیر نے پاکستان وچ امن و امان بارے اقدامات نوں سراہندیاں آکھیا اوہ پاکستان دی ترقی لئی پرامید نیں۔ جاپانی سفیر نے آئی سی ٹی دی سکیورٹی تے پلس چیک پوسٹاں دے حوالے نال حالیہ اقدامات دی تعریف کیتی۔ غیر ضروری چیک پوسٹاں ختم کرن نال عوام دی آمدورفت وچ سہولتاں پیدا ہوئیاں نیں۔وزیر داخلہ آکھیا پاکستان تے جاپان وچکار قنون نافذ کرن والے اداریاں وچکار تعاون ودھان دی لوڑ اے۔





















