مشکلاں دے باوجود حکومت نوں ہٹان لئی ساڈی کوشش جاری اے: مولانا فضل الرحمٰن
کوئٹہ( پنجابی میڈیا گروپ)پی ڈی ایم دے سربراہ مولانا فضل الرحمان آکھیا اے مشکلاں ضرور نیں پر سرکار نوں ہٹان لئی ساڈی جدوجہد جاری ا ے۔ کوئٹہ وچ میڈیا نال گل کردیاں فضل الرحمان آکھیا دہشت گردی خاتمے دے دعوے کیتے گئے پر ایہدے باوجود واقعات ہو رہے نیں۔ دہشت گردی دے ختم کرن دے دعویاں دے باوجود مچھ وچ دہشت گردی ہوئی۔ آئے دن ٹارگٹ کلنگ ہو رہی اے، دہشت گردی ختم کرن دا کیوں دعویٰ کیتا گیا سی۔ پی ڈی ایم سربراہ آکھیا ہر تھاں سانوں پذیرائی مل رہی اے۔ پی ڈی ایم دے تاریخی جلسے تے ریلیاں ہو رہیاں نیں، عوامی رلت ودھدی جا رہی اے۔ عوام ایس ویلے اک پیج تے نیں۔ موجودہ حکومت دھاندلی زدہ، ایہنوں استعفیٰ دینا پوے گا۔ مشکلاں وی آندیاں نیں پر ساڈی کوشش اے کہ جلد نااہل سرکار توں جان چھوٹ جائے۔ شیخ رشید دے سوال تے مولانا فضل الرحمان نے صحافیاں توں آکھیا اوہ سنجیدہ سوال کرن اوہناں دا کہنا سی مولانا شیرانی دے بیانات تے کجھ نہیں کہواں گا۔





















