کورونا نال ہور 41بندے جاں بحق، 2ہزار توں ودھ مثبت کیس رپورٹ
اسلام آباد( پنجابی میڈیا گروپ) ملک بھر وچ کورونا وائرس نال اک دن وچ 41بندے جاں بحق ہو گئے جد کہ 2ہزار توں ودھ مثبت کیس رپورٹ ہوئے نیں۔ نیشنل کمانڈ اینڈ آپریشن سینٹر ولوں جاری کیتے اعداد و شمار دے مطابق پچھلے 24 گھنٹیاں دے دوران 40 ہزار 088 کورونا ٹیسٹ کیتے گئے، جہدے بعد مجموعی کووڈ 19 ٹیسٹاں دی تعداد 71 لکھ 62 ہزار 626 ہوگئی اے۔پچھلے24 گھنٹیاں دے دوران ملک بھر وچ ہور 2 ہزار 408 مثبت کیس رپورٹ ہوئے نیں، ایس طرح پاکستان وچ کورونا دے مصدقہ مریضاں دی تعداد 5 لکھ 06 ہزار 701 ہوگئی اے۔سرکاری اعداد و شمار دے مطابق ہن تک سندھ وچ 2 لکھ27 ہزار 885 ، پنجاب وچ اک لکھ 46 ہزار 016، خیبر پختونخوا وچ 61 ہزار 648، اسلام آباد وچ 39 ہزار 340، بلوچستان وچ 18 ہزار 429، آزاد کشمیر وچ 8 ہزار 501 تے گلگت بلتستان وچ 4 ہزار 882 بندیاں وچ کورونا دی تشخیص ہوئی اے۔سرکاری اعداد و شمار دے مطابق ایس ویلے ملک بھر وچ کورونا دے فعال مریضاں دی تعداد34ہزار007ہوگئی اے جد کہ2 ہزار توں ودھ مریضاں دی حالت تشویشناک اے۔





















