پی ڈی ایم وچ مایوسی پھیل چکی اے، اوہ صرف اپنی تسلی لئی جلسے کررہے نیں، شاہ محمود قریشی
اسلام آباد(بیورو رپورٹ ) وزیرخارجہ شاہ محمود قریشی نے آکھیا اے کہ اسیں عرصہ دراز توں مقبوضہ جموں وکشمیر وچ جاری بھارتی مظالم نوں دنیا بھر دے ساہمنے اجاگر کردیاں چلے آرہے آں اج ایہوی گونج برطانوی پارلیمنٹ وچ سنائی دے رہی اے۔ خطے وچ امن وامان تے ملکی سیاسی صورتحال دے حوالے توں بیان دیندیاں ہویاں وزیرخارجہ شاہ محمود قریشی ہوراں داآکھنا سی کہ پاکستان نوں بوہت اطمینان ہویا اے کہ جہڑیاں گلاں اسیں پچھلے دو سال توںآکھدے چلے آرہے ساں اج دنیا ایہدی تائید کررہی اے۔ بھارت پراپیگنڈ کررہیا سی کہ ایہہ ایہناں دا اندرونی مسئلہ اے۔ پر برطانوی پارلیمنٹیرینز نے واضح کر دتا کہ ایہہ عالمی سطح اتے متنازعہ مسئلہ اے جہدے اتے سلامتی کونسل دی بوہت ساریاں قرارداداں موجود نیں۔ایہہ بھارت دا اندرونی معاملہ ہرگز نہیں اے۔شاہ محمود قریشی ہوراں نے مزیدآکھیا اے کہ بھارت دنیا نوں ایہہ تاثر دینا چاہندا سی کہ مقبوضہ جموں وکشمیر وچ حالات معمول اتے آچکے نیں۔ پر برطانوی پارلیمنٹیرینز نے بھارت دے ایس جھوٹھے دعوئواں دی قلعی کھول دتی۔ ایہہ امر کشمیریاں لئی حوصلہ افزائی دا باعث اے۔ ایس آواز دے نال ہندوستان دا چہرہ مزید بے نقاب ہووے گا۔ وزیرخارجہ شاہ محمود قریشی نے مزیدآکھیا اے کہ بھارت افغان سرزمین نوں پاکستان دے خلاف استعمال کرن دی مذموم کوشش کر رہیااے اسیں افغان حکام نوں وی ایس صورتحال توں ٰآگاہ کر چکے آں۔ اوہناں نے ملکی سیاست ات گل بات کردیاں ہویاں مزیدآکھیا ا ے کہ پی ڈی ایم وچ مایوسی پھیل چکی اے، اوہ صرف اپنی تسلی لئی جلسے کررہے نیں، استعفیاں دے معاملے اتے اندرونی اختلافات ساڈے علم وچ نیں۔ مسلم لیگ ن دے اندر مختلف آراء ساڈے کولوں ڈھکی چھپی نہیں تے جے یو آئی دی قیادت وچ وی اختلاف سبھ دے ساہمنے اے۔۔





















