سرکاری ملازم دا نیب وچ کیس ہویا تے پروموٹ نہیں ہووے گا: شفقت محمود

اسلام آباد( پنجابی میڈیا گروپ) شفقت محمود آکھیا اے بیورو کریسی تے سول سروس اصلاحات وچ اہم پیش رفت اے، سرکاری ملازم دا نیب وچ کیس ہویا تے پروموٹ نہیں ہووے گا، پلی بارگین کرن والے دے خلاف وی ایکشن ہووے گا، تن اے سی آر ٹھیک نہ ہون تے ریٹائرمنٹ ہووے گی۔ اسلام آباد وچ پریس کانفرنس کردیاں وزیر تعلیم شفقت محمود دا کہنا سی سول سروسز ریفارم دے 6حصیاں تے کل فیصلے ہوئے، سرکاری ملازماں دی پروموشن وچ تبدیلیاں کیتی گئیاں نیں، جے سرکاری ملازم دا نیب وچ کیس ہویا تے اوہدی ترقی نہیں ہووے گی، سرکاری ملازماں دی ترقی 3سال وچ کرن دا فیصلہ کیتا گیا، کابینہ کمیٹی ادارہ جاتی اصلاحات دا مقصد اداریاں دی کارکردگی بہتر بنانا اے، پہلی وار تقرری دی مجاز اتھارٹی دا تعین کیتا گیا۔ وزیر تعلیم شفقت محمود آکھیا ملازماں دی ترقی لئی بورڈز دے اختیارات وچ وادھا کیتا گیا،سول سروس ملازماں لئی روٹیشن پالیسی بنائی اے، روٹیشن پالیسی تے عمل نہ کرن والے افسر دی پروموشن نہیں ہووے گی، سرکاری افسر کسے صوبے وچ 10ورھے توں ودھ نوکری نہیں کر سکدا۔

اپنا تبصرہ گھلو