دشنام طرازی تے پروپیگنڈے دے باوجود کسے دی دھونس دھاندلی وچ نہیں آواں گے: چیئرمی نیب
لہور( پنجابی میڈیا گروپ) نیب نے ہاؤسنگ سوسائٹیاں دی جعلسازی وچ آئے 3ہزار توں ودھ متاثرین نوں 76 کروڑ روپے واپس دوا دتے۔ چیئرمین نیب نے متاثرین وچ چیک تقسیم کیتے۔ اوہناں دا کہنا سی نیب نے ہمیشہ قنون دی حکمرانی تے مکمل عملدرآمد نوں یقینی بنایا۔ تفصیل دے مطابق چیئرمین جسٹس (ر) جاوید اقبال نے نیب لہور آفس دا دورہ کیتا۔ ایس موقع تے ڈائریکٹر جنرل نیب لہور دی سربراہی وچ کمبائنڈ انویسٹی گیشن ٹیماں نے میگا کرپشن کیساں وچ ہون والی پیشرفت تے بریفنگ دتی۔ چیئرمین نیب نے ماڈل ہاؤسنگ انکلیو تے فیروز پورہ ہاؤسنگ سوسائٹی دے 3ہزار توں ودھ متاثرین وچ 76کروڑ روپے مالیت دے چیک تقسیم کیتے۔ تقریب نال خطاب کردیاں چیئرمین نیب آکھیا نیب نے ہمیشہ قنون دی حکمرانی تے مکمل عملدرآمد نوں یقینی بنایا۔ تاریخ وچ پہلی وار پلی بارگین قنون دے تحت 2سال دے گھٹ عرصہ وچ ڈھائی ارب دی خطیر رقم ملزمان توں برآمد کروا کے ہزاراں متاثرین وچ تقسیم کیتی گئی۔جسٹس (ر) جاوید اقبال آکھیا نیب دے خلاف دشنام طرازی کیتی گئی پر قومی ادارہ ہر قسم دی دھونس نوں بالائے طاق رکھدیاں ہویاں صرف تے صرف میرٹ تے کم جاری رکھے گا۔





















