فارن فنڈنگ کیس پانامہ 2 بنے گا: شیخ رشید
اسلام آباد (پنجابی میڈیا گروپ)وفاقی وزیرِ داخلہ شیخ رشید احمد آکھدے نیں کہ مولانا فضل الرحمن میرے پیر بھائی نیں، دعوت دیندے تے اسرائیل مردہ باد ریلی وچ شریک ہوندا،ایہدے نال خطاب وی کر دا۔ کراچی وچ میڈیا دے نال گل بات کردیاں ہویاں وفاقی وزیرِ داخلہ شیخ رشید احمد داآکھنا اے کہ فارن فنڈنگ کیس اہمیت اختیار کر جاوے گا تے پاناما 2 بن جاوے گا۔وزیرِداخلہ شیخ رشید ہوراں نے آکھیا اے کہ میرا مشورہ اے کہ مریم نواز فارن فنڈنگ کیس پڑھ لین۔ مریم صاحبہ لئی مشکل ویلا اے۔ مزید املاک ساہمنے آن گیاں اگر اپوزیشن تعاون کرے گی تے اسیں وی کراں گے۔ اوہناں نے مزیدآکھیا اے کہ مولانا فضل الرحمن توں پہلاں وی ہتھ ہویا ہن وی ہووے گا اوہ سبھ توں زیادہ خسارے وچ رہن والی سیاسی شخصیت ہون گے۔ شیخ رشید احمد نے آکھیا کہ میں اپنی ذمہ داریاں وچ کسی نوں مداخلت نہیں کرن دیا ں گا۔ بطور وزیرِ داخلہ میں اپنی ذمے داریاں پوری کراں گا۔اوہناں نے مزیدآکھیا کہ ایم کیو ایم میری بھائی تنظیم اے،ایہدے نال ہمیشہ توں چنگا تعلق رہیا اے۔ اسیں نادرا نوں لوکائی دے میعار دا بنانا اے۔ اوہناں نے مزیدآکھیا اے کہ اگر اپوزیشن تعاون کرے گی تے لانگ مارچ دی وی اجازت دیاں گے۔





















