گوجرانوالہ: ڈنڈےمار مار خاتون تے4بال مار دتے
گوجرانوالہ(پنجابی میڈیا گروپ ) پنجاب دے ضلع گوجرانوالہ وچ4 بالاں تے ماں نوں ڈنڈے مار مار کے قتل کر دتا گیا ۔افسوسناک واقعہ تھانہ کینٹ دے علاقے ڈوگرانوالہ وچ پیش آیا۔ پلیس داآکھنااے کہ پنجاں افراد دی لاشاں گھردے اک کمرے توں ملیاں نیں۔ ماں تے بالاں نوں ڈنڈے مار کے قتل کیتا گیا اے۔ آر پی او گوجرانوالہ ریاض نذیر نے 5افراد دے قتل دے واقعے دی رپورٹ طلب کرلئی تے ملزمان دی فوری گرفتاری دا حکم دے دتا اے۔پلیس داآکھنا اے کہ بالاں دی عمراں5توں12سال دے وچکار نیں۔ ساریاں نعشاں گھردے اک کمرے توں ملیاں نیں۔ خون گھر توں بار آن اتے اہل علاقہ نے پلیس نوں اطلاع دتی۔ قتل دی وجوہات معلوم نہیں ہوسکیاں۔گھر وچ کوئی ہور فرد وی موجود نہیں سی۔ پلیس داآکھنا اے کہ قتل کیتے جان والے بال مبینہ طور تے مقتول خاتون دے نیں۔ مقتول خاتون دا شوہر ایہدے نال رہن دی بجائے دوجے گائوں وچ رہندا سی۔ لاشاں نوں نیڑے ہسپتال منتقل کرکے چھان بین شروع کردتی گئی اے۔ ایدھر وزیراعلیٰ پنجاب نے گوجرانوالہ وچ ماں تے چاربالاں دے قتل دے واقعے دا نوٹس لیندیاں ہویاں آرپی او گوجرانوالہ کولوں واقعے دے حوالے دے نال رپورٹ طلب کرلئی اے۔ ایس حوالے دے نال وزیراعلیٰ پنجاب عثمان بزدارہوراں نے آکھیا اے کہ واقعے وچ ملوث ملزمان کسی قسم دی رعایت دے مستحق نہیں نیں۔ ملزمان نوں جلد ازجلدکیفر کردار تیک پہنچایا جاوے گا۔





















