حمزہ شہباز شریف دی ضمانت لئی دائر درخواست واپس
اسلام آباد(پنجابی میڈیا گروپ)سپریم کورٹ نے منی لانڈرنگ کیس وچ گرفتار مسلم لیگ ( ن )دے رہنما حمزہ شہباز شریف دی ضمانت لئی دائر درخواست واپس لین دی بنیاد اتے نمٹا دتی اے۔ جمعہ نوں جسٹس مشیر عالم دی سربراہی وچ تن رکنی بنچ نے کیس اتے سماعت کیتی۔ دوران سماعت جسٹس سردار طارق مسعود نے حمزہ شہباز شریف دے وکیل دے نال استفسار کیتا کہ تساں کیس میرٹ اتے لڑنا چاہندے اوہ یا ہارڈشپ دی بنیاد اتے؟جہدے اتے حمزہ شہباز شریف دے وکیل نے عدالت نوں دسیا کہ اسیں ہارڈشپ اتے ضمانت منگ رہے آںکیونکہ اک سال 7 ماہ توں میرا مؤکل جیل وچ اے ایس ویلے حالات ہور سن گرفتاری نوں اک سال توں گٹھ عرصہ ہویا سی، ہارڈشپ ذکر ایس لئی نہیں کیتا گیا کیونکہ ایس ویلے ہارڈ شپ دا گرائونڈ نہیں بنندا سی۔ جدوں ضمانت لئی رجوع کیتا تے حمزہ شہباز دے خلاف ریفرنس دائر نہیں ہویا سی۔ الزام 7ارب دا سی ریفرنس 53 کروڑ دا دائر ہویا،دوران سماعت جسٹس سردار طارق مسعود نے ریمارکس دتے کہ ہائیکورٹ وچ ہارڈشپ دا ذکر ای نہیں کیتا گیا تے سپریم کورٹ کیویں ہارڈشپ دا مسئلہ ویکھ سکدی اے ،جہڑا نقطہ ہائیکورٹ وچ نہیں چکیا گیا اسیں ا وہ کیویں سنیے،احتساب عدالت دی رپورٹ دے بعد مناسب ہووے گا ہائیکورٹ دے نال رجوع کرو۔





















