پی ڈی ایم صرف اپنی کرپشن بچانا چاہ رہی اے: چودھری سرور
لہور(پنجابی میڈیا گروپ)گورنر پنجاب چودھری سرور نے آکھیا اے کہ پی ڈی ایم کرپشن دا تحفظ تے احتساب دا خاتمہ چاہندی اے۔ وزیراعظم عمران خان دی ایمانداری اتے کوئی وی انگلی نہیں چک سکدا ۔گورنر پنجاب چودھری سرور دے نال وزیر اعظم دے معاون خصوصی شہزاد اکبر نے ملاقات کیتی۔ گورنر ہائوس وچ ہون والی ملاقات وچ چودھری سرور تے شہزاد اکبر نے کر پشن دے خاتمے، سیاسی تے حکومتی امور سنے دیگر ایشوز اتے گل بات کیتی۔ ایس موقع اتے گورنر پنجاب چودھری سرور داآکھنا سی کہ اوپن ووٹنگ دے بل دی مخالفت ہارس ٹریڈنگ دی سپورٹ کرنا اے۔ کسی وی معاملے وچ شفافیت تے میرٹ اپوزیشن نوں برداشت نہیں ہوندا۔ پی ڈی ایم دا غیر فطری اتحاد اپنے منطقی انجام تیک اپڑ گیا اے۔ شرکار شفاف احتساب دے اصولی موقف اتے ڈٹی ہوئی اے۔ ہر معاملے وچ ضد تے انا اتے قائم اپوزیشن دا کوئی سیاسی مستقبل نہیں۔ چودھری سرور نے مزیدآکھیا اے کہ وزیراعظم عمران خان کسی صورت مخالفین دے دبائو وچ آن والے نہیں۔ سرکار مضبوط تے مستحکم اے کسی لانگ مارچ دے نال کوئی فرق نہیں پین لگا۔





















