سیاسی دکان چمکان لئی اداریاں اتے تنقید اپوزیشن دا وطیرہ اے، شاہ محمود قریشی
اسلام آباد (پنجابی میڈیا گروپ ) وزیر خارجہ شاہ محمود قریشی نے آکھیا اے کہ سیاسی دکان چمکان لئی اداریاں اتے تنقید اپوزیشن دا وطیرہ اے۔پی ڈی ایم صرف مفادات دی سیاست کر رہی اے۔ ایہہ صرف لٹ مار دا پیسہ بچانا چاہندے نیں۔ سینیٹ چنائو دے حوالے توں عدالتی رہنمائی دا احترام کراں گے ۔ اپنے اک بیان وچ وزیر خارجہ شاہ محمود قریشی ہوراں نے آکھیا اے کہ پی ڈی ایم دے مفادات اک طرف نیں تے ایہناں دی سیاست دوجے پاسے، اپوزیشن نوں چارٹر آف ڈیموکریسی دے مطابق موقع فراہم کیتا، اپوزیشن دس دیوے کہ ایہناں دے مفادات ،میثاق جمہوریت دے نال مطابقت نہیں رکھدے۔ پی ڈی ایم وچ شامل کجھ عناصر سیاسی دکان چمکان لئی اداریاں اتے تنقید کر رہے نیں۔ اداریاں اتے بلاوجہ تنقید دے نال دشمن دے بیانیہ دی حمایت کیتی جارہی اے۔ پی ڈی ایم دے بعض لوکائی بچگانہ بیانات دے رہے نیں۔ سپریم کورٹ ساڈی درخواست اتے جہڑی رہنمائی فرمائے گی اسیں ایہدا احترام کراں گے۔ آئینی تشریح لئی عدالت جان تے آئین وچ ترمیم دے دوای رستے سن۔ ساڈے کول دو تہائی اکثریت نہیں اے۔ ن لیگ تے پیپلز پارٹی جمہوریت دا راگ الاپتے، اوپن ووٹنگ دا مطالبہ کردے رہے، ہن ن لیگ تے پیپلز پارٹی اپنے وعدیاں توں منحرف وکھائی دے رہے نیں اوہ اج وی کرپٹ پریکٹسز نوں تحفظ دینا چاہندے نیں۔ اپوزیشن کنفوژن دا شکار اے۔





















