لانگ مارچ روکن دا کوئی پلان نہیں:وزیراعظم

اسلام آباد( پنجابی میڈیا گروپ)وزیراعظم عمران خان آکھیا اے لانگ مارچ روکن دی کوئی پلاننگ نہیں، اپوزیشن جو کرنا چاہندی اے کرے۔ لوکائی ایہناں دی کرپشن بچان لئی باہر نہیں نکلے گی۔ اک انٹرویو دے دوران وزیراعظم دا کہنا سی اکثریت نہ ہون دی وجہ توں سینیٹ وچ جا کے قنون پھس جاندا اے۔ میثاق جمہوریت وچ اوہناں نے آپ آکھیا سی اوپن بیلٹ نال الیکشن ہونا چاہیدا اے پر ہن ایہ پچھے ہٹ رہے نیں، ایہناں دی کوشش این آر او اے جہڑا نہیں ملنا۔ وزیراعظم دا کہنا سی چار وار مینار پاکستان نوں تحریک انصاف نے بھریا سی۔ میں لوکاں نوں کرپشن دے خلاف باہر کڈھیا سی۔ ایہ جو مرضی کر لین، عوام باہر نہیں نکلے گی۔ ملکی معاشی صورتحال تے گل کردیاں وزیراعظم دا کہنا سی مہنگائی دی اصل وجہ روپے دی قدر گھٹ ہونا اے۔ ڈالر ودھن نال تیل دی قیمتاں دگنا جد کہ ستر فیصد دالاں مہنگیاں ہوئیاں۔ ساڈی کوشش اے لوکاں تے مہنگائی دا بھار گھٹ توں گھٹ ہووے۔ مہنگائی وچ کمی دے حوالے نال اقدامات کر رہے آں۔ اک سوال دا جواب دیندیاں اوہناں دا کہنا سی اپوزیشن نال پہلے دن توں گل بات نوں تیار آں پر اوہناں نے این آر او تے آ جانا اے۔ وڈے وڈے ڈاکوواں ون پوائنٹ ایجنڈا چوری بچانا اے۔ پیپلزپارٹی نال گل بات دے سوال تے وزیراعظم مسکرا پئے تے آکھیا اوہناں نوں چنگی طرح جاننا آں، کیہ گل کراں، اوہناں نے اقتدار وچ رہ کے چوری کیتی۔عمران خان دا کہنا سی پچھلے 30ورھیاں توں سینیٹ الیکشن وچ ووٹاں دی خرید و فروخت ہوندی آ رہی اے۔ 2018ء وچ 20ارکان نوں پیسے لین تے پارٹی توں کڈھ دتا سی۔ وزیراعظم آکھیا جے میرے کول ویڈیو ہوندی تے پہلاں ای عدالت وچ پیش کر دیندا۔ ویڈیو ساہمنے آن توں ثابت ہو گیا کہ سینیٹ الیکشن وچ پیسہ چلدا اے۔ ویڈیو معاملے دی تحقیقات لئی ہدایات جاری کر دتیاں نیں۔

اپنا تبصرہ گھلو