سینیٹ ٹکٹاں اُتے پھڈا: وزیراعظم دا کئی امیدواراں توں ٹکٹ واپس لین دا فیصلہ
اسلام آباد( پنجابی میڈیا گروپ) سینیٹ دیاں ٹکٹاں دئی تقسیم اُتے پی ٹی آئی وچ پھڈاپاروں کئی نامزد امیدواراں توں سینیٹ ٹکٹاں واپس لیتے جان داامکان اے۔
سینیٹ دیاں ٹکٹاں دی تقسیم اُتے صوبائی تنظیماں دے اعتراض توں بعد وزیراعظم عمران خان نے پارٹی دے سینئر رہنماواں توں مشورہ کیتا اے۔ سینیٹ ٹکٹاں وچ تبدیلی بارے پارلیمانی بورڈ نے تجویزاں پیش کردتیاں۔ذرائع دے مطابق پی ٹی آئی دے کئی نامزد امیدواراں نے سینیٹ ٹکٹ واپس لیتے جان دا امکان اے۔ سینیٹ ٹکٹاں وچ تبدیلی بارے فیصلہ وزیراعظم عمران خان کرن گے۔
سینیٹ دیاں ٹکٹاں اُتے پی ٹی آئی وچ ملک بھر وچ اختلافات ساہمنے آئے نیں۔ پچھلے دناں وزیر خارجہ شاہ محمود قریشی توں پی ٹی آئی سندھ دے نراض عہدیداراں نے کراچی ایئرپورٹ اُتے ملاقات کیتی تے ٹکٹاں دی تقسیم اپتے گل بات کیتی ، اوہناں آکھیاکہ سینیٹ دیاں جنرل نشست اندرون سندھ نال تعلق رکھن والے شخص نوں دتی جائے، فیصل واوڈا نوں وی سینیٹ داامیدوار نہیں ہونا چاہیدا، سیف اللہ ابڑو پیپلز پارٹی لئی کم کردے رہے نیں، اوہناں نوں ٹکٹ دینا کسی صورت مناسب نہیں اے، اگر اوہناں نوں ٹکٹ دتے گئے تو فیر اسیں وی بلدیاتی الیکشناں توں وکھ ہوجاواں گے۔





















