سیاسی ماحول گرم رکھن لئی پی ڈی ایم نویں اعلانات کر رہی اے: گورنر پنجاب
لہور( پنجابی میڈیا گروپ) گورنر پنجاب چودھری سرور آکھیا اے سیاسی ماحول گرم رکھن لئی پی ڈی ایم نویں اعلانات کر رہی اے، سیاسی مخالف چیئرمین سینیٹ دے خلاف تحریک عدم اعتماد دا نتیجہ نہ بھُلن، اپوزیشن نکام ہو وے گی، عام انتخابات اپنے ویلے تے ہون گے۔ گورنر پنجاب نال صوبائی وزیر ہاؤسنگ میاں محمود الرشید نے ملاقات کیتی۔ ایس موقع تے چودھری سرور دا کہنا سی وزیراعظم دے خلاف تحریک عدم اعتماد اپوزیشن دا نواں سیاسی شوشہ اے، اپوزیشن جے تحریک عدم اعتماد دا شوق پورا کرنا چاہندی اے تے شوق نال کرے، عمران خان بطور وزیراعظم تے حکومت دوواں2023تک قائم رہن گے۔چودھری سرور آکھیا ہن وی ویلا اے اپوزیشن سینیٹ چوناں وچ اوپن بیلٹ دی حمایت کر دیوے، اوپن بیلٹ نال سینیٹ چوناں وچ شفافیت تے ایوان بالا دا تقدس بحال ہووے گا، خفیہ رائے شماری نال وی حکومتی تے اتحادی سینیٹرز امیدوار کامیاب ہون گے۔ اوہناں دا کہنا سی افواج پاکستان نوں تنقید دا نشانہ بنانا ملکی تے قومی مفادات دے خلاف اے، اپوزیشن سیاست کرے پر قومی اداریاں نوں متنازعہ بنان دی سازش نہ کرے۔





















