ڈاکٹر عبدالقدیر خان نے نقل و حرکت تے پابندی نوں سپریم کورٹ وچ چیلنج کر دتا

اسلام آباد: پاکستان دے نامور ایٹمی سائنس دان ڈاکٹر عبدالقدیر خان نے اپنی نقل و حرکت تے پابندی دے خلاف سپریم کورٹ وچ اپیل دائر کر دتی۔ ڈاکٹر قدیر خان نے لہور ہائی کورٹ دے فیصلے دے خلاف سپریم کورٹ وچ درخواست دائر کردیاں آکھیا 25 ستمبر نوں ہائی کورٹ نے میری آزادانہ نقل و حرکت دی اجازت دی عرضی خارج کر دتی، عدالت عظمیٰ توں درخواست اے ہائی کورٹ دا فیصلہ کالعدم قرار دے کے میری اپیل منظور کیتی جاوے۔

ڈاکٹر عبدالقدیر خان نے اپیل وچ آکھیا میری 84سال عمر اے تے اکثر بیمار رہنا آں، میرے نال جہڑا سلوک کیتا جا رہیا اے اوہ ملک دے کسے سائنسدان دے نال نہیں کیتا گیا، قنون دے مطابق ہر شہری نوں آزادانہ نقل و حرکت ، اظہار رائے دی آزادی حاصل اے۔

ایٹمی سائنسدان آکھیا مینوں کینسر دے مرض دی تشخیص ہو چکی اے اجہی حالت وچ پابندیاں جان لیوا ہو سکدیاں نیں، حکومتی ادارے گمراہ کن پروپیگنڈا کر رہے نیں میری جان نوں خطرہ اے، اک عمر رسیدہ بندے نوں سکول کالج تے یونیورسٹیاں وچ کیہ خطرہ پیش آ سکدا اے، میری سکیورٹی دا ایہ مطلب ہرگز نہیں نقل و حرکت تے پابندی لاگو کر دتی جاوے۔