پنجاب وچ 30سیاحتی مقامات نوں ترقی دین دا فیصلہ
لہور( پنجابی میڈیا گروپ)حکومت پنجاب نے صوبے وچ 30نویں سیاحتی مقامات نوں ترقی دین دا فیصلہ کیت ااے جہدے نال سالانہ سو ارب روپے توں ودھ دی آمدن حاصل ہووے گی جد کہ 20ہزار بندیاں نوں روزگار ملے گا۔ حکومت پنجاب نے ٹورازم فار اکنامک گروتھ پروگرام شروع کرن دا فیصلہ کیتا اے جہدی وزیراعلیٰ عثمان بزدار نے منظوری دے دتی اے۔ پروگرام دے تحت بدھ مت، سکھاں دے 8مقدس مقامات، ہڑپہ دی پنج ہزار سال پرانی تہذیب تے مری دے نیڑے کوٹلی ستیاں تے نڑ دے مقامات نوں سیاحت لئی ترقی دین دا فیصلہ کیتا اے۔ منصوبے دے تحت خوشاب، چکوال، جہلم تے میانوالی دی سالٹ رینج وچ بارہ توں چودہ مقامات وکھو وکھ مذہباں لئی مقدس جانے جاندے نیں ایہدے علاوہ ہندو مت دے شاہی قلعے تے پرانی تہذیب دے آثار نوں مھفوظ بنان تے سیاحواں لئی کھولن دا فیصلہ کیتا گیا اے۔ مری وچ سیاحواں دا رش گھٹ کرن تے نویں سائٹ ڈویلپ کرن لئی مری دی ایکسٹینشن دا وی فیصلہ کیتا گیا اے جہدے تحت کوٹلی ستیاں تے نڑ دے مقامات نوں وی سیاحواں لئی سہولتاں نال مزین کیتا جائے گا چیئر لفٹ بنائی جاؤن گے، روڈ تے وکھو وکھ سہولتاں دی فراہمی کیتی جائے گی۔





















