سینیٹ الیکشن خفیہ بیلٹ دے تحت ہون گے ،سپریم کورٹ
اسلام آباد (پنجابی میڈیا گروپ)سپریم کورٹ نے سینیٹ انتخابات اوپن بیلٹ دے ذریعے کران توں متعلق صدارتی ریفرنس اتے مختصر رائے دے دتی اے۔ آٹھ صفحات اتے مشتمل رائے چیف جسٹس نے تحریر کیتی،فیصلہ چار اک دے تناسب د ے نال جاری کیتا گیا،جسٹس یحییٰ آفریدی دا فیصلے توں اختلاف کردیاں ہویاں ریفرنس نوں غیر قانونی قرار دیندیاں واپس صدرنوں بھجوا دتااے۔ 5 رکنی بینچ وچ چیف جسٹس گلزار احمد دے نال نال جسٹس مشیر عالم، جسٹس عمر عطا بندیال، جسٹس اعجازالاحسن تے جسٹس یحییٰ آفریدی وی شامل سن۔سپریم کورٹ دے 5 رکنی بینچ نے 4 اک دی اکثریت دے نال رائے دتی تے چیف جسٹس نے رائے پڑھ کے وی سنائی ۔سپریم کورٹ نے اپنی رائے وچ آکھیا کہ سینیٹ الیکشن آئین دے آرٹیکل226 دے مطابق خفیہ بیلٹ دے ذریعے ای ہون گے ، ایہہ الیکشن کمیشن د ی ذمہ داری اے کہ شفاف تے منصفانہ چنا دا انعقاد کرائے۔ ایہہ وی الیکشن کمیشن دی ذمہ داری اے کہ اوہ انتخابی عمل وچ کرپٹ پریکٹس دی روک تھام لئی اقدامات کرے۔سپریم کورٹ ورکرز پارٹی کیس وچ قرار دے چکی اے کہ شفاف انتخابات دا انعقاد الیکشن کمیشن دی ذمہ داری اے،الیکشن کمیشن آئینی ذمہ داریاں پوری کرے،عدالت نے اپنی رائے وچ مزیدآکھیا یا کہ پارلیمنٹ نوں وی آئین نے ایہہ اختیار دتا اے کہ اوہ کرپٹ پریکٹس تے دیگر غیرقانونی سرگرمیاں نوں روکے‘ پارلیمنٹ انج دی کوئی قانون سازی نہیں کر سکدی جہدے نا ل الیکشن کمیشن نو ں حاصل اختیارات وچ کمی ہووے۔ وفاق پاکستان تے سارے صوبے آئینی طور تے پابندنیں کہ اوہ الیکشن کمیشن دی معاونت کرے۔ جتھوں تیک خفیہ بیلٹنگ دا تعلق اے سپریم کورٹ اپنے فیصلے وچ جواب دے چکی اے۔ اختلافی نوٹ دی وجوہات بعد وچ جاری کیتاں جان گیاں۔





















