شہباز دور دے اک ہور منصوبے لہور رنگ روڈ وچ 59ارب دے بے ضابطگیاں

لہور: سابق وزیراعلیٰ شہباز شریف دور دے اک ہور وڈے منصوبے لہور رنگ روڈ وچ ارباں روپے دی بے ضابطگیاں دا انکشاف ہویا اے۔ ایس حوالے نال سپیشل آڈٹ رپورٹ تیار کر لئی گئی جہدے مطابق سول ورک، زمین دی خریداری، فنانشل مینجمنٹ تے ٹھیکہ دین وچ 59ارب 39کروڑ 94لکھ روپے توں ودھ دی بے ضابطیاں ہوئیاں، زمین دی خریداری وچ 15ارب 51کروڑ، ودھ قیمتاں دی مد وچ 4ارب 36کروڑ دی بے ضابطگیاں ہوئیاں۔

ٹھیکیداراں نوں بغیر تخمینہ دے 32کروڑ 25لکھ روپے دی ادائیگی کیتی گئی جد کہ پیمائشاں دا ریکارڈ نہ رکھن دے باوجود 33کروڑ 72لکھ روپے تے سدرن لوپ دے ڈیزائن وچ تبدیلی لئی 65کروڑ 67لکھ روپے اضافی ادا کیتے گئے جد کہ ایہدی رپورٹ تیار کرن لئی 8کروڑ 4لکھ روپے بلاجواز ادا کیتے گئے، کمپاؤنڈ انٹرسٹ دی مد وچ 44کروڑ 45لکھ روپے ادا کیتے گئے۔

ایسے طرح 42ارب 38کروڑ روپے دی ادائیگیاں دے کوئی دستاویزی ثبوت ای نہیں۔ محکمہ مواصلات تے آڈیٹر جنرل پاکستان نے 2006توں 2016دے دوران رنگ روڈ دی تعمیر تے آن والی لاگت دی سپیشل آڈٹ رپورٹ تیار کیتی جہنوں پبلک اکاؤنٹس کمیٹی وچ پیش کر دتا گیا، اگلے اجلاس وچ ایہدے تے تفصیلی بریفنگ دتی جاوے گی۔