پی ایس ایل 6: کورونا پاروں ملتوی ہون والے سیزن نوں مکمل کراواں گے: وسیم خان

لہور( پنجابی میڈیا گروپ) پی ایس ایل 6نوں ملتوی کرن دے بعد پی سی بی دے چیف ایگزیکٹو وسیم خان نے کورونا وباء پاروں ایونٹ نوں ملتوی کرن دی تصدیق کردیاں آکھیا اے اسیں پچھلے سیزن دی طرح ایس سیزن وی مکمل کرنا چاہنے آں۔ کراچی وچ پریس کانفرنس کردیاں وسیم خان نے آکھیا پی ایس ایل سکس نویاں تریخاں دے ساہمنے آؤن تک ملتوی کر دتی گئی اے تے ایہ دن ساڈے لئی بڑا سخت اے۔ اوہناں دا کہنا سی ساڈے نال نال، کرکٹ دے شائقین، سٹیک ہولڈراں، پاکستان کرکٹ دے عالمی سطح تے مداح، سارے کھڈاری تے آفیشلز جہڑے پی ایس ایل نال جڑے سن، سبھ لئی ایہ مشکل دن اے۔ پی ایس ایل نوں منعقد کرن دا فیصلہ دو ٹیسٹ سیریز، نیشنل ٹی ٹونٹی تے قائداعظم ٹرافی دے انعقاد نوں ساہمنے رکھ کے کیتا گیا سی جتھے کئی کھڈاریاں تے ٹیماں نے وکھو وکھ مقامات تے ایس او پیز دے تحت کھیڈیا سی۔ وسیم خان دا کہنا سی ایہ ساڈے لئی بہت وڈی تکلیف دہ اے کہ سانوں اجہے حالات دا ساہمنا کرنا پیا کہ سانوں کھڈاریاں دے تحفظ لئی اوہ سبھ کجھ کرن دی لوڑ پئی جہڑی سانوں کرنی سی تے اسیں فرنچائز دے مالکان نال مشاورت کیتی تے ایس نتیجے تے اپڑے کہ ایونٹ نوں ملتوی کر دتا جائے۔

اپنا تبصرہ گھلو