اقتدار دی خاطر چپ نہیں بیٹھاں گا : وزیراعظم
اسلام آباد( پنجابی میڈیا گروپ)وزیراعظم عمران خان دا کہنا اے میں بزدل نہیں مقابلہ کرنا جاننا آں، اقتدار دی خاطر چپ ہو کے نہیں بیٹھاں گا، عہدے لئی اپنا مقصد نہیں بدل سکدا۔ وزیراعظم عمران کان دی زیر صدارت حکومتی رہنماواں دا اجلاس ہویا، جہدے وچ وفاقی کابینہ ارکان تے نومنتخب سینیٹرز وی شریک ہوئے جد کہ چیئرمین سینیٹ صادق سنجرانی نے اجلاس وچ خصوصی رلت کیتی۔اجلاس وچ چیئرمین سینیٹ دے انتخاب دی حکمت عملی تے غور کیتا گیا تے وزیراعظم عمران خان نے صادق سنجرانی تے اعتماد دا اظہار کردیاں آکھیا ایہ چیئرمین سینیٹ دے انتخاب وچ ساڈے امیدوار ہون گے۔ وزیراعظم دا کہنا سی میں بزدل نہیں مقابلہ کرنا جاننا آں، اقتدار دی خاطر چپ ہو کے نہیں بیٹھاں گا، عہدے لئی اپنا مقصد نہیں بدل سکدا، بوسیدہ نظام دی تبدیلی میرا مشن اے، اپوزیشن دی پیسہ دی سیاست نوں بے نقاب کردا رہواں گا۔ عمران خان نے آکھیا دیس وچ نظام دی تبدیلی دا مشن لے کے آیا آں موقف توں پچھے نہیں ہٹاں گا، میں جے نظریہ تے سمجھوتا کر لواں، حکومت کرنا آسان ہو جائے ، اداریاں دی مضبوطی تے شفافیت یقینی بناؤن لئی جدوجہد جاری رہوے گی۔دوجے پاسے وزیراعظم نے اپنا اک ویڈیو بیان وچ جاری کیتا اے جہدے وچ اوہناں دا کہنا سی مینوں جے کوئی سرکار جاؤن دی خبراں دے کے بلیک میل کرن دی کوشش کرے تے میں فیر وی ایہناں چوراں تے ڈاکوواں نوں نہیں چھڈاں گا بھانویں میری جان وی چلی جائے، ایہ میرا اپنی قوم نال وعدہ اے۔
