وزیراعظم اج اپنے وِکے ہوئے ارکان توں اعتماد دا ووٹ لین گے: مریم نواز
لہور( پنجابی میڈیا گروپ)مسلم لیگ (ن) دی نائب صدر مریم نواز دا کہنا اے سینیٹ چوناں دے نتائج مگروں وزیراعظم عمران خان نے آکھیا ارکان وِگ گئے، تے اج اوہ ایہناں وِکے ہوئے ارکان توں اعتماد دا ووٹ لین گے۔ پارلیمانی پارٹی دے اجلاس مگروں میڈیا نال گل کردیاں مریم نواز دا کہنا سی ضمنی تے سینیٹ چوناں وچ سرکار نوں شکست دے دتی اے، ہن مسلم لیگ (ن) آزاد کشمیر وچ وی کامیابی حاصل کرے گی، مسلم لیگ دا کلچر تبدیل ہو گیا۔ مریم نواز دا کہنا سی الیکشن کمیشن نے جہڑی رائے دتی اوہ آئین دے تحت دتی، آئین وچ ترمیم دا نہ ای الیکشن کمیشن تے نہ ای سپریم کورٹ نوں اختیار اے، سپریم کورٹ نے اوہی اپوزیشن تسلیم کیتی جہڑی الیکشن کمیشن نے لئی، الیکشن کمیشن نے سپریم کورٹ وچ آئینی پوزیشن لئی سی۔ لیگی رہنما نے آکھیا بلوچستان تے کے پی کے وچ ارباں پتی لوکاں نوں ٹکٹاں دتی گئیاں، اوتھے حکومتی ارکان جِتے تے الیکشن بالکل ٹھیک اے، اسلام آباد وچ اک نشست ہار جاؤن تے الیکشن ٹھیک نہیں، ہن اداریاں نوں وی پتہ چل گیا اے کہ اداریاں دی تضحیک کرن والے کہڑے لوک نیں۔





















