سینیٹ الیکشن وچ ساڈے16ارکان وِکے سن: وزیراعظم دا اعتراف
اسلام آباد( پنجابی میڈیا گروپ) وزیراعظم عمران خان نے اعتراف کردیاں آکھیا اے سینیٹ الیکشن وچ ساڈے 16ارکان نے پیسے لے کے خود نوں ویچیا۔ وزیراعظم عمران خان دی زیر صدارت پارلیمانی پارٹی دا اجلاس ہویا جہدے وچ پی ٹی آئی تے اتحادی جماعتاں دے ارکان نے رلت کیتی، ذرائع دے مطابق وزیراعظم نے اعتماد دا ووٹ لین دے فیصلے تے ارکان نوں اعتماد وچ لیا تے آکھیا جہنوں میرے اُتے اعتماد نہیں اوہ کھل کے اظہار کرے۔ ایس موقع تے پی ٹی آئی ارکان نے اجلاس وچ وزیراعظم دے حق وچ نعرے لائے جد کہ خیبر پختونخوا نال تعلق رکھن والے ارکان جذبات ہو گئے۔ ارکان اسمبلی نے آکھیا وزیراعظم صاحب حلقہ اسیں سنبھالاں گے پر تسیں اپنے مقصد تے ڈٹے رہو۔ اجلاس نال خطاب کردیاں وزیراعظم آکھیا تہانوں لوکائی نے ووٹ دی امانت دے کے ایوان وچ گھلیا اے، تسیں ضمیر دی آواز تے فیصلہ کرو، پیسے لے کے ووٹ دینا بددیانیتی اے، سدی گھی کرنا آں سادے 16ارکان نے پیسے لے کے خود نوں ویچیا ایس لئی میں جے تہاڈی نظر وچ غلط آں تے بے شک میرا ساتھ چھڈ دیو۔ وزیراعظم نے آکھیا میں اک مقصد لے کے سیاست شروع کیتی اے، میں جمہوریت تے آزادی رائے تے یقین رکھنا آں جد کہ مینوں کوئی بلیک میل کرکے اپنی گل نہیں منوا سکیا۔





















