اداریاں نے وزیراعظم نوں اعتماد دا ووٹ دلایا، شاہد خاقان عباسی
اسلام آباد(پنجابی میڈیا گروپ )مسلم لیگ نون دے رہنما شاہد خاقان عباسی نے دعویٰ کیتا اے کہ ملک دے اداریاں نے وزیراعظم عمران خان نوں اعتماد دا ووٹ دلایا۔ایوان توں غیر حاضر رکن نوں وزیراعظم نے دھمکیاں دتیاں پراسپیکر قومی اسمبلی خاموش رہے۔ جدوں تیک آئین تے قانون دے رستے اتے واپس نہیں آواں گے ملک اگے نہیں ودھے گا۔ اسلام آباد دی احتساب عدالت وچ ایل این جی ریفرنس دی سماعت دے بعد میڈیا دے نال گل بات کردیاں ہویاں پچھلے وزیراعظم شاہد خاقان عباسی نے آکھیا اے کہ دنیا دے پا رلیمان دا اصول اے آدمی ایوان وچ نہ ہووے ایہدی گل نہیں کرسکدے۔ شاہد خاقان ہوراں نے آکھیا ملک وچ اخلاقیات دی پراو ہ ختم ہو چکی اے۔ اپوزیشن نوں دھمکیاں تے گالیاں دتیاں گیاں ۔ اسپیکر صاحب خاموش رہے ایہناں ہائوس چلان دا تے اخلاقی قدراں دا علم نہیں۔ لیگی رہنما نے آکھیا یوسف رضا گیلانی دے الیکشن توں پہلاں وی ارکان نوں دھمکیاں دتیاں گیاں۔ شاہد خاقان نے آکھیا کہ سرکار تے ہارس ٹریڈنگ کر چکی اے، 70 کروڑ بلوچستان وچ کس نے دتے؟ 50 ،50 کروڑ فنڈ دا وعدہ سیاسی رشوت نہیں تے کیہ اے؟وزیراعظم عمران خان نے اک اک ایم این اے نوں بلا کے فنڈز دتے۔ ملک وچ پارلیمان دا نظام مفلوج اے۔





















