ملک دے شمالی علاقیاں وچ شدید ٹھنڈ، سکردو وچ درجہ حرارت منفی 18تک ڈگ گیا
ملک بھر وچ سردی دی شدت برقرار اے جد کہ شمالی علاقے شدید سردی دی لپیٹ وچ نیں۔ سکردو وچ درجہ حرارت منفی 18ڈگری سینٹی گریڈ تک ڈگ گیا اے جد کہ استور وچ درجہ حرارت منفی 12تے گوپس وچ منفی 9ڈگری سینٹی گریڈ ریکارڈ کیتا گیا۔ استور وچ شدید سرد موسم دی وجہ توں ہر شے جمن نال عوامی مسئلے تے مشکلات وچ وادھا ہو گیا اے۔ دوجے پاسے کراچی وچ وی ٹھنڈیاں ہواواں دا راج اے جتھے گھٹ توں گھٹ درجہ حرارت 9ڈگری سینٹی گریڈ ریکارڈ کیتا گیا اے۔
محکمہ موسمیات دے مطابق پچھلے24 گھنٹیاں دے دوران اسلام آباد وچ ریکارڈ کیتا جان والا گھٹ توں گھٹ درجہ حرارت اک ڈگری سینٹی گریڈ رہیا جد کہ لہور وچ 6، پشاور وچ صفر، کوئٹہ وچ منفی 4، مظفر آباد وچ صفر، گلگت وچ منفی 6، ملتان وچ 3، فیصل آباد وچ 2 تے حیدر آباد وچ گھٹ توں گھٹ درجہ حرارت 8 ڈگری سینٹی گریڈ رہیا۔ملک بھروچ سردی دی شدت دے حوالے نال محکمہ موسمیات داکہنا اے کہ پنجاب تے بالائی سندھ دے بیشتر میدانی علاقیاں جد کہ خیبر پختونخوا دے بعض ضلعیاںوچ رات تے صبح دے اوقات وچ شدید دھند چھائی رہن دی توقع اے۔محکمہ موسمیات داہور کہنا اے کہ ملک دے دوجے علاقیاں وچ موسم سرد تے خشک جد کہ بالائی علاقیاں وچ شدید سرد رہوے گا۔
