معاشی پالیسیاں دے مثبت نتائج آنا شروع ہو گئے نیں: مشیر خزانہ

کراچی: مشیر خزانہ عبدالحفیظ شیخ دا کہنا اے معاشی اصلاحات دے دوران مشکلات پیش آئیاں پر ہن ساڈی پالیسیاں دے مثبت نتائج آنا شروع ہو گئے نیں۔ کراچی وچ تقریب نال خطاب کردیاں مشیر خزانہ حفیظ شیخ دا کہنا سی پی ٹی آئی سرکار نوں بھیڑے حالاں معیشت ملی، قرضیاں وچ ڈبے ہوئے پاکستان نوں وزیراعظم دی زیر قیادت مشکل معاشی حالات توں کڈھیا، عمران خان چاہندے نیں چنگے لوک اُتے آن، پاکستان وچ اداریاں نوں بہتر کیتا جا رہیا اے۔

مشیر خزانہ دا کہنا سی معاشی اصلاحات دے دوران بہت ساریاں مشکلاں پیش آئیاں، پر ہن ساڈی معاشی پالیسیاں دے مثبت اثرات آنا شروع ہو گئے نیں، عالمی مالیاتی ادارے ملکی معاشی کارکردگی دے معترف نیں تے ایشیائی ترقیاتی بینک نے پاکستان نوں زیادہ مدد فراہم کرن لئی خصوصی آلات بنائے۔ حفیظ شیخ آکھیا اسیں پچھلیاں حکومتاں دے لئے گئے 10ارب ڈالر دے قرضے واپس کیتے، ملکی برآمدات ودھان لئی موثر اقدامات کیتے گئے، سرکار نے بزنس فرینڈلی ماحول نوں فروغ دتا، ایس حکومت توں ودھ کوئی حکومت بزنس فرینڈلی نہیں اے۔ ہن بیرونی سرمایہ کاری وچ نمایاں وادھا ہو رہیا اے۔