کوفے دی سیاست نال مدینے دی ریاست نہیں بن سکدی: بلاول بھٹو زرداری
راولپنڈی: بلاول بھٹو زرداری آکھیا اے ملک وچ نواں پاکستان دے ناں تے سیاسی یتیماں دا راج اے، ملک بحراناں دا شکار اے، صوبیاں دے حقوق کھوئے جا رہے نیں۔ کوفے دی سیاست نال مدینے دی ریاست نہیں بن سکدی، اصل جمہوریت بحال کرکے رہواں گے۔ پاکستان پیپلزپارٹی دے چیئرمین دا بے نظیر بھٹو دی برسی دے موقع تے لیاقت باغ وچ جلسے نال خطاب کردیاں کہنا سی شہید بی بی نے جلاوطنی کٹی تے جان دے خطرے دے باوجود واپس آئیاں۔ 2007
ء وچ ایسے تھاں اوہناں نے آخری خطاب کیتا پر مسلم امہ دی پہلی خاتون وزیراعظم نوں شہید کر دتا گیا۔ اک ٹبر توں پیو، دوواں پتر تے فیر دھی وی شہید کر دتی گئی۔ بلاول آکھیا بھٹو خاندان طاقت دا سرچشمہ عوام نوں سمجھدے سن۔ اسیں انتقام تے انتشار نہیں پھیلایا۔ روٹی، کپڑا تے مکان دا وعدہ پورا کیتا۔ صدر زرداری نے مفاہمت دی سیاست کیتی۔ سوات، مالاکنڈ نوں دہشت گرداں توں آزاد کروایا تے ملک نوں سی پیک دا تحفہ دتا۔ اوہناں دا کہنا سی راولپنڈی گواہ اے کہ شہید بھٹو قائد عوام سن جہناں نے ٹُٹیا ملک جوڑیا، ملک نوں آئین دتا، ایہنوں ایٹمی قوت بنایا، مسلم امہ نوں لہور وچ جمع کیتا، مزدوراں نوں حقوق دتے، عوام نوں ووٹ دا حق دوایا پر ہر گلی تے ہر محلہ گواہ اے کہ ایہناں نوں تختہ دار تے لٹکایا گیا۔بلاول آکھیا اج عوام دا معاشی قتل ہو رہیا اے۔ موجودہ حکومت عوام لئی عذاب بنی ہوئی اے۔
اج پارلیمنٹ تے تالا لگ چکیا اے۔ اج فیر ایہ دھرتی پکار رہی اے کہ میں خطرے وچ آں۔ 18ویں ترمیم تے حملے ہو رہے نیں تے صوبیاں توں حقوق کھوئے جا رہے نیں۔ بے نظیر انکم سپورٹ پروگرام توں 8لکھ لوکاں نوں کڈھیا گیا۔ ملکی معاشی فیصلے عوام نہیں سگوں آئی ایم ایف لے رہیا اے۔
کشمیر تے تاریخی حملہ ہویا اے۔ اوہناں دا کہنا سی ملک وچ نویں پاکستان دے ناں تے سیاسی یتیماں دا راج اے۔ میں بی بی شہید دے مشن نوں جاری رکھاں گا تے ایہنوں پورا کراں گا۔ ایہ تجربہ فیل ہو وے گا، ملک وچ آئینی تے معاشی بحران اے۔
