ایم کیو ایم عمران خان دی حکومت ڈیگن وچ ساڈا ساتھ دیوے: بلاول بھٹو
کراچی: چیئرمین پاکستان پیپلزپارٹی بلاول بھٹو زرداری دا کہنا اے ایم کیو ایم پاکستان تحریک انصاف نال اتحاد ختم کرے تے حکومت نوں ڈیگن وچ ساڈا ساتھ دیوے۔
کراچی وچ میگا منصوبیاں دی افتتاحی تقریب نال خطاب کردیاں بلاول بھٹو زرداری دا کہنا سی ایم کیو ایم پاکستان تحریک انصاف نال اتحاد ختم کرے، ایم کیو ایم ایس حکومت نوں ڈیگ دیوے اسیں تہاڈا ساتھ دیواں گے، کراچی تے ایہدے عوام دی خاطر جنی وزارتاں وفاق وچ ایم کیو ایم دے کول نیں اسیں سندھ وچ دین لئی تیار آں، پر صرف شرط ایہ اے کہ عمران خان نوں گھر بھیجن۔
بلاول بھٹو آکھیا صوبیاں دے مطالبات پورے نہیں کیتے جا رہے جد کہ وفاق دی گیس پالیسی دی مذمت کرنے آں، گیس دی مسئلے تے سندھ دا حق ماریا جا رہیا اے ایس لئی سانوں وفاق توں اپنا حصہ کھونا پوے گا۔ بلاول بھٹو زرداری آکھیا شہر قائد دی ترقی ساڈی خواہش اے، شہر قائد وچ پورے پاکستان دے لوک وسدے نیں، ساڈا کم نظر وی آندا اے تے اسیں وکھا وی سکنے آں، ملک دے عوام مسئلیاں وچ گھرے نیں جد کہ معاشی حالات خطرناک نیں تے غریب عوام دے مسئلیاں وچ دن بدن وادھا ہو رہیا اے۔
