جہنے کرپشن کیتی سزا بھگتے گا، احتساب توں پچھے نہیں ہٹاں گے: وزیراعظم

اسلام آباد: وزیراعظم عمران خان آکھیا اے جہنے کرپشن کیتی اوہ سزا بھگتے گا تے حکومت احتساب توں پچھے نہیں ہٹے گی۔

اسلام آباد وچ وزیراعظم دی زیر صدارت میڈیا سٹرٹیجی اجلاس ہویا جہدے وچ نیب ترمیمی آرڈیننس تے اپوزیشن دے ردعمل دا جائزہ وی لیا گیا۔

قنونی ٹیم نے نیب ترمیمی آرڈیننس تے حکومتی رہنماواں نوں بریفنگ دیندیاں آکھیا نیب آرڈیننس وچ ترمیم کسے نوں فائدہ اپڑان لئی نہیں، ہن بزنس کمیونٹی تے ٹیکس بارے معاملات ایف بی آر ویکھے گا۔

ایس موقع تے وزیراعظم آکھیا نیب آرڈیننس بارے حکومت دے خلاف منفی پروپیگنڈا کیتا گیا، جہنے کرپشن کیتی اوہ سزا بھگتے گا، احتساب توں پچھے نہیں ہٹاں گے، نیب قوانین وچ اصلاحات خود اپوزیشن دا وی مطالبہ رہیا اے، پر اپوزیشن پارلیمنٹ وچ قنون سازی دے بجائے ذاتی کیساں دا دفاع کردی اے۔ عمران خان نے ہور آکھیا معاشی ٹیم دی محنت دی بدولت 2019وچ معیشت نوں استحکام ملیا، 2020وچ عام بندے نوں معیشت دی بہتری دے ثمرات ملن گے۔