نیب آرڈیننس وچ کرپٹ نہیں ایماندار بندیاں نوں تحفظ دتا گیا: فردوس عاشق

اسلام آباد: وزیراعظم دی معاون خصوصی برائے اطلاعات و نشریات فردوس عاشق آکھیا اے نیب ترمیمی آرڈیننس وچ کرپٹ بندیاں نوں نہیں سگوں ایمانداراں نوں تحفظ دتا گیا اے۔

اسلام آباد وچ تقریب نال خطاب کردیاں فردوس عاشق آکھیا سرکار کرپٹ بندیاں نوں ریلیف دین دا سوچ وی نہیں سکدی، کرپٹ بندیاں نوں نیب ترمیمی آرڈیننس وچ کوئی رعایت نہیں دتی گئی اے سگوں ایمانداراں نوں تحفظ دتا گیا اے، ملک وچ ہن قنون دی حکمرانی نوں قائم کیتا جا رہیا اے، اج اسیں نیب تے ایف آئی اے نوں آزاد کر دتا اے۔

معاون خصوصی آکھیا شرطیہ کہنی آں اپوزیشن وچوں کسے نے آرڈیننس نوں پڑھیا نہیں بس روایتی تنقید تے اتر آئے نیں، نیب آرڈیننس وچ نقائص دور کرن لئی ترامیم تجویز کیتیاں تے اپوزیشن فیر نوحہ کناں اے، این آر او لین والے ای این آر او پلس دے حوالے نال بہتر دس سکدے نیں، اوہ بھل گئے نیں کہ این آر او متعارف کران والے اوہ آپ نیں، قنون دے ساہمنے پیش ہونا ایہناں نوں تکلیف دیندا اے تے عمران خان ایہناں نوں ایس قسم دیاں تکلیفاں دیندے رہن گے۔