پنجاب حکومت نے پتنگ بازی روکن دی نکامی دا اعتراف کر لیا

لہور: صوبائی حکومت ولوں پنجاب اسمبلی وچ پتنگ بازی دے حوالے نال تفصیلات پیش کر دتیاں نیں جہدے وچ ایہدی روک تھام تے نکامی دا اعتراف کر لیا گیا اے۔

محکمہ داخلہ پنجاب نے اعتراف کیتا اے پلس پتنگ بازی دے معاملے وچ مقدمیاں دے اندراج توں اگے نہیں ودھ سکی۔ ایس ورھے دے دوران شہر دے وکھو وکھ تھانیاں وچ پتنگ بازی دے 1349مقدمات رجسٹر کیتے گئے۔ پنجاب اسمبلی وچ جمع کرائی گئی تفصیلات وچ آکھیا گیا اے ماڈل ٹاؤن ڈویژن وچ 800جد کہ سٹی ڈویژن وچ 549مقدمات درج ہوئے پر سول لائن ڈویژن نے مقدمیاں دی تفصیل پیش نہیں کیتی۔

محکمہ داخلہ دے مطابق پتنگ بازی دی روک تھام لئی سارے وسائل نوں بروئے کار لیایا جا رہیا اے۔ مسیتاں، کیبل تے ٹی وی تے انسداد پتنگ بازی دے اشتہارات وی دتے گئے پر ایس سلسلے وچ چلائی گئی آگاہی مہم وی کم نہیں آئی۔