مسئلہ کشمیر دے حل تک بھارت نال تعلقات بہتر نہیں ہو سکدے: وزیراعظم

اسلام آباد( پنجابی میڈیا گروپ وزیراعظم عمران خان دا کہنا اے کشمیر نوں حق خود ارادیت دتے بغیر بھارت دے نال تعلقات نارمل نہیں ہو سکدے۔ وزیراعظم عمران خان دی زیر صدارت بھارت دے نال تعلقات دے حوالے نال اہم اجلاس ہویا جہدے وچ وزیر خارجہ شاہ محمود قریشی تے وزارت خارجہ دے اعلیٰ حکام نے رلت کیتی۔ اجلاس وچ وزارت خارجہ ولوں بھارت دے نال تجارت دے حوالے نال تجاویز تے بریفنگ دتی گئی تے اتفاق ہویا کہ مقبوضہ کشمیر دی آئینی صورتحال بحال ہون تک بھارت دے نال کسے قسم دی تجارت نہیں ہو سکدی۔ وزیراعظم عمران خان دا کہنا سی ساڈا اصولی موقف اے کہ کشمیر دا مسئلہ حل کیتے بغیر بھارت دے نال تجارت نہیں ہو وے گی، ایہدے نال غلط تاثر جائے گا کہ اسیں کشمیر نوں نظر انداز کرکے بھارت نال تجارت شروع کریئے، کشمیر نوں حق خود ارادیت دتے بغیر بھارت دے نال تعلقات نارمل نہیں ہو سکدے۔

اپنا تبصرہ گھلو