”بے بی زرداری” دی سیاست پیو دی کرپشن دی قیدی اے: مراد سعید
اسلام آباد: بلاول بھٹو دی تقریر تے ردعمل دیندیاں وفاقی وزیر مراد سعید آکھیا اے ”بے بی زرداری” دی سیاست پیو دی کرپشن دی قیدی اے۔ مراد سعید نے اپنے بیان وچ آکھیا حادثاتی چیئرمین دا المیہ ایہ اے کہ جدوں وی ٹی وی تے نمودار ہون گے، کرپشن دا دفاع کرن گے۔
”بے بی زرداری” کرپشن دی ہر واردات دا دفاع کردے نیں، ایہناں دے پیو نے کرپشن دے اجہے اجہے شرمناک طریقے ایجاد کیتے کہ دنیا حیران اے۔ وفاقی وزیر مراد سعید آکھیا قوم نے اپنے ڈھڈ کٹ کے محروم تے نادار طبقے لئی انکم سپورٹ پروگرام دی حمایت کیتی پر بلاول دے پیو نے انکل نواز دے نال رل کے انکم سپورٹ دے فنڈ نوں جیالے تے متوالے پالن لئی استعمال کیتا۔
اوہناں دا کہنا سی حکومت ڈیگن دا خواب پیو پتر نوں دن رات پریشان کر رہیا اے۔ ڈیڑھ سال ایسے پریشانی وچ لنگھیا، اگلے ساڈھے تن ورھے وی ایسے کرب وچ گزارن گے۔ اوہناں آکھیا سگوں ایہدے بعد وی انشا اللہ شرمندگی تے پریشانی دا ای ساہمنا رہوے گا۔
