وزیراعلیٰ پنجاب دا اقلیتی کوٹے دی خالی آسامیاں تے بھرتیاں لئی فوری کاروائی دا حکم
لہور: وزیراعلیٰ پنجاب عثمان بزدار نے اقلیتی کوٹے تے خالی آسامیاں تے بھرتیاں لئی فوری کاروائی دا حکم دیندیاں آکھیا اے ایہنوں چھیتی مکمل کرکے مشتہر کیتا جائے۔ تفصیل دے مطابق وزیراعلیٰ پنجاب عثمان بزدار نال رکن قومی اسمبلی ڈاکٹر رمیش کمار نے ملاقات کیتی تے سپریم کورٹ دے احکامات توں آگاہ کیتا۔ وزیراعلیٰ نے اوہناں نوں اقلیتاں بارے سپریم کورٹ دے احکامات تے فوری عملدرآمد دی یقین دہانی کراندیاں ہویاں خالی سیٹاں دی تفصیلات طلب کر لیاں۔ اوہناں نے ہدایات جاری کیتیاں کہ محکمہ قنون تے محکمہ انسانی حقوق اک ہفتے دے اندر اوہناں نوں رپورٹ پیش کرن۔ اوہناں دا کہنا سی وزیراعظم عمران خان دے ویژن دے مطابق اقلیتاں نوں ترقی دے مساوی مواقع فراہم کر رہے نیں۔ وزیراعلیٰ عثمان بزدار دا کہنا سی اقلیتی نوجواناں نوں تعلیمی اداریاں وچ وی بھرپور مواقع میسر نیں۔ صوبہ پنجاب وچ اقلیتی برادریاں لئی فنڈز مختص کیتے گئے نیں۔ پاکستان تحریک انصاف دی حکومت مذہبی رواداری تے مساوی حقوق تے یقین رکھدی اے۔





















