پیپلزپارٹی تے اے این پی اپنے فیصلیاں تے نظرثانی کرے، گل سنن نوں تیار آں: فضل الرحمان
اسلام آباد( پنجابی میڈیا گروپ) جے یو آئی (ف) دے سربراہ مولانا فضل الرحمان دا کہنا اے پیپلزپارٹی تے اے این پی اپنے فیصلیاں تے نظرثانی کرے اسیں گل سنن نوں تیار آں۔ اسلام آباد وچ پی ڈی ایم دا اجلاس مولانا فضل الرحمان دی رہائش گاہ تے ہویا جہدے وچ پیپلزپارٹی، اے این پی دی پریس کانفرنساں تے بیانات دا جائزہ لیا گیا جد کہ اجلاس وچ 8جماعتاں دے نمائندیاں نوں سدیا گیا پر پیپلزپارٹی تے اے این پی نوں سدیا نہیں گیا سی۔ اجلاس مگروں میڈیا نال گل کردیاں مولانا فضل الرحمان آکھیا پی ڈی ایم منصب لئی لڑن دا فورم نہیں، اسیں نہیں چاہندے تنظیمی معاملات سڑکاں تے لیایئے، بڑی مشکلاں آئیاں نیں ایس لئی گل نال حل کڈھو، اسیں مکمل احترام نوں ملحوظ خاطر رکھ کے جواب طلب کیتے پر افسوس اے جواب دین دے بجائے استعفے بھجوا دتے، پیپلزپارٹی تے اے این پی اپنے فیصلیاں تے نظرثانی کرے اسیں گل سنن نوں تیار آں۔





















