پنجاب:سمارٹ لاک ڈاؤن 26اپریل تک ودھا دتا گیا
لہور( پنجابی میڈیا گروپ)پنجاب وچ نافذ کورونا سمارٹ لاک ڈاؤن وچ 26اپریل تک توسیع دے دتی گئی۔ 8فیصد توں ودھ مثبت شرح والے شہراں وچ لائی گئی پابندیاں دی مدت وی ودھائی گئی اے۔ سیکرٹری پرائمری اینڈ سکینڈری ہیلتھ کیئر نے نوٹیفکیشن جاری کر دتا۔ نوٹیفکیشن دے مطابق یکم اپریل توں شروع سمارٹ لاک ڈاؤن ہن 26اپریل تک نافذ العمل رہے گا۔ لہور، راولپنڈی، ملتان، فیصل آباد، سرگودھا، گوجرانوالہ، رحیم یار خان، بہاولپور، بہاولنگر، چنیوٹ، حافظ آباد، قصور، ننکانہ صاحب، پاکپتن، ٹوبہ ٹیک سنگھ تے شیخوپورہ نوںکورونا دے8 فیصد توں ودھ مثبت شرح والے شہراں وچ شامل کیتا گیا اے۔8فیصد توں ودھ مثبت شرح والے ایہناں شہراں وچ ان ڈور کھانیاں، آؤٹ ڈور شادیاں، مرکیز سمیت ساری تقریبات تے مکمل پابندی ہووے گی، ایہناں شہراں وچ مزار وی زائرین لئی بند رہن گے، دوجے پاسے پابندیاں صوبہ بھر وچ نافذ العمل رہن گیاں۔ صوبہ بھر وچ ٹرین سروس کل گنجائش دے 70فیصد مسافراں دے نال جاری رہے گی، سارے کاروباری مراکز شام 6وجے بند جب کہ ہفتہ تے اتوار نوں مکمل طور تے بند رہن گے۔





















