لہور وچ احتجاج، رینجرز تعینات کرن دا حکم

لہور( پنجابی میڈیا گروپ) وزیر قنون پنجاب دی سربراہی وچ ہون والے اہم اجلاس وچ لہور دے 16اہم تھاواں تے پلس دے نال رینجرز تعینات کرن دا حکم دے دتا گیا اے، حالات زیادہ خراب ہون تے فوج دی خدمات لئی جا سکے گی۔ تفصیل دے مطابق صوبائی سب کیبنٹ کمیٹی برائے داخلہ دا وزیر قنون راجہ بشارت دی سربراہی وچ اہم اجلاس ہویا جہدے وچ صوبے خوصاً لہور وچ احتجاج دی صورتحال دا جائزہ لیا گیا۔ ذرائع دے مطابق اجلاس وچ اہم فیصلہ کردیاں ہویاں لہور دے 16تھاواں تے پلس دے نال نال رینجرز وی تعینات کرن دا حکم دے دتا گیا اے۔ وزیراعلیٰ سیکرٹریٹ، جی او آر ون، سول سیکرٹریٹ، گورنر ہاؤس، پنجاب اسمبلی، آئی جی آفس دے باہر رینجرز تے پلس تعینات ہووے گی۔ ایہدے علاوہ لہور مال روڈ، کینال روڈ تے پلس تے رینجر دے اہلکار مشترکہ گشت کرن گے جہڑا قنون ہتھ وچ لوے گا اوہنوں فوری گرفتار کرکے مقدمہ درج کرن دا حکم دے دتا گیا اے۔اجلاس وچ فیصلہ کیتا گیا کہ پلس تے رینجرز دی ذمہ داری ہووے گی کہ امن و امان دی صورتحال بہتر بناون پر حالات زیادہ خراب ہون تے پاک فوج دی خدمات لئی جا سکن گیاں۔ اجلاس نال خطاب وچ راجہ بشارت دا کہنا سی کسے نوں قنون ہتھ وچ لین دی اجازت نہیں دتی جائے گی۔ ہسپتالاں نوں جاون والے راہ کھلے رکھے جاون۔ بہت برداشت کر لیا، راستے بند نہیں ہون دیاں گے۔

اپنا تبصرہ گھلو