قنون توڑن والیاں دے خلاف سخت کاروائی کراں گے: عثمان بزدار
لہور( پنجابی میڈیا گروپ)وزیراعلیٰ عثمان بزدار نے آکھیا اے قنون توڑن والیاں تے امن و امان متاثر کرن والیاں دے خلاف سخت قنونی کاروائی عمل وچ لیائی جائے گی۔وزیراعلیٰ پنجاب نے امن و امان تے راستے بحال ہون تے اظہار تشکر کردیاں آکھیا پنجاب دے سارے علاقیاں وچ راستے کھل چکے نیں، پلس، انتظامیہ تے قنون نافذ کرن والے اداریاں نے اپنے فرائض خوش اسلوبی نال سرانجام دتے، پلس ، انتظامیہ تے دوجے سارے قنون نافذ کرن والے اداریاں دی کارکردگی تے خراج تحسین پیش کرنا آں۔ عثمان بزدار دا کہنا سی شہریاں نے مشکل ویلے وچ پھسے ہوئے لوکاں دی مدد کرکے چنگے پاکستانی ہون دا ثبوت دتا، حکومت قنون شکنی کرن والیاں دے خلاف زیرو ٹالرنس دی پالیسی تے عمل پیرا اے، کسے نوں وی شہری یا سرکاری املاک نوں نقصان اپڑان دی اجازت نہیں دیاں گے۔و زیراعلیٰ پنجاب نے واضح کیتا کہ تشدد تے ہنگامہ آرائی کسے وی صورت قابل برداشت نہیں۔





















