منی لانڈرنگ کیس: زرداری، فریال تالپور سنے سارے ملزماں تے فرد جرم لاگو کرن دا فیصلہ

اسلام آباد: احتساب عدالت نے میگا منی لانڈرنگ تے پارک لین ریفرنسز وچ آصف زرداری تے فریال تالپور سنے دوجے ملزماں تے فرد جرم لئی 22جنوری دی تریخ مقرر کر دتی۔ عدالت نے سارے ملزماں نوں نوٹس جاری کر دتے۔

احتساب عدالت اسلام آباد دے جج اعظم خان نے میگا منی لانڈرنگ تے پارک لین ریفرنسز دی سماعت کیتی۔ سابق صدر دی بھین فریال تالپور عدالت دے ساہمنے پیش ہوئیاں۔ دوران سماعت آصف زرداری دے وکیل فاروق ایچ نائیک نے اپنے موکل دی حاضری توں چھوٹ دی عرضی دائر کردیاں آکھیا آصف زرداری دا کراچی وچ علاج جاری اے، ایہناں نوں کئی امراض لاحق نیں۔

عدالت نے قرار دتا میگا منی لانڈرنگ تے پارک لین ریفرنسز وچ اگلی سماعت تے فرد جرم تے لاگو کیتی جاوے گی۔ سارے ملزمان حاضری یقینی بنان۔ عدالت نے آصف زرداری، فریال تالپور، انور مجید، عبدالغنی مجید، حسین لوائی، نمر مجید، یونس قدوائی سنے دوجے ملزماں نوں نوٹس جاری کر دتے۔

نیب دے تفتیشی افسر نے دسیا ضمنی ریفرنس وچ 9نویں ملزماں نوں شامل کیتا جاوے، 5ملزماں دا ناں فہرست توں کڈھ دتا۔ عدالت نے پارک لین تے میگا منی لانڈرنگ ضمنی ریفرنسز دی سماعت 22جنوری تک ملتوی کر دتی۔