وزیراعلیٰ پنجاب دی اسمبلی توں مسلسل غیر حاضری دے خلاف تحریک استحقاق جمع

لہور: وزیراعلیٰ پنجاب عثمان بزدار دی اسمبلی توں مسلسل غیر حاضری دے خلاف تحریک استحقاق جمع کرا دتی گئی، تحریک استحقاق رکن پنجاب اسمبلی سعدیہ تیمور نے جمع کروائی۔ تحریک استحقاق وچ آکھیا گیا وزیراعلیٰ عثمان بزدار دی پنجاب اسمبلی توں مسلسل غیر حاضری نال ایس ایوان دا استحقاق مجروح ہویا، عثمان بزدار پچھلے چھ مہینے توں پنجاب اسمبلی نہیں آئے، وزیراعلیٰ اجلاس دی کاروائی وچ شریک نہیں ہو رہے، عثمان بزدار دی عدم رلت نال اراکین وچ سخت تشویش پائی جاندی اے۔ تحریک استحقاق دے متن وچ ہور آکھیا گیا قائد ایوان دی پنجاب اسمبلی دے اجلاس توں غیر حاضری ایہناں دی غیر ذمہ داری اے، عثمان بزدار دی عدم شرکت اسمبلی نوں اہمیت نہ دین دا ثبوت اے، وزیراعلیٰ پنجاب دی مسلسل غیر حاضری توں حکومتی اراکین وی کشمکش وچ مبتلا نیں، ایوان وزیراعلیٰ دی مسلسل غیر حاضری نوں ایہناں دی کوتاہی قرار دیندا اے، استدعا اے کہ تحریک نوں استحقاق کمیٹی دے سپرد کیتا جاوے۔