سپریم کورٹ نے نیب دی دوران تحقیقات ملزماں دی گرفتاری تے سوال کر دتا

اسلام آباد: سپریم کورٹ نے نیب ولوں دوران تحقیقات ملزماں دی گرفتاری تے سوال کر دتا۔ جسٹس مشیر عالم دی سربراہی وچ سپریم کورٹ دے تن رکنی بنچ نے نیب ملزم فیصل کامران قریشی دی درخواست ضمانت دی سماعت کیتی۔ سپریم کورٹ نے نیب ولوں دوران تحقیقات ملزماں دی گرفتاری تے سوال کر دتا۔

جسٹس مشیر عالم نے ریمارکس دتے نیب انکوائری تے تحقیقات دے معاملیاں وچ جلدی کیوں نہیں کردا، کسے نوں سزا دینی اے دے دیو، جے کسے نوں پھانسی لانا اے تے لا دیو، نیب ملزماں نوں گرفتار کرکے جیل وچ سُٹ دیندا اے، ملزم دی گرفتاری دے بعد گواہیاں تے ثبوت لبھدا رہندا اے، ساری کاروائی تے تحقیقات مکمل کرکے گرفتار کیوں نہیں کردا۔

عدالتی ریمارکس تے نیب دے وکیل آکھیا ملزماں دی گرفتاری ریکارڈ وچ ٹمپرنگ دے خدشہ دے پیش نظر کیتی جاندی اے، ملزم فیصل کامران نے سٹاک ایکسچینج وچ سرمایہ کاری دے ناں تے لوکاں دے نال فراڈ کیتا۔

ملزم دے خلاف ریفرنس دائر کر دتا اے، کوشش کراں گے ریفرنس تے جلد کاروائی پوری ہو جاوے۔