ایرانی جنرل قاسم سلیمانی دے جنازے وچ بھج نس نال 50شرکاء جاں بحق، 215زخمی
تہران: ایرانی جنرل قاسم سلیمانی دے آبائی شہر کرمان وچ جنازے دے جلوس وچ بھج نس مچن نال 50شرکاء جاں بحق تے 215توں ودھ زخمی ہو گئے۔ 3جنوری نوں عراق دے دارالحکومت بغداد دے ایئر پورٹ تے امریکی راکٹ حملیاں وچ ہلاک ہون والے ایرانی جنرل قاسم سلیمانی دی نماز جنازہ اوہناں دے آبائی شہر کرمان وچ وی اداکیتی گئی۔ قاسم سلیمانی دی نماز جنازہ وچ ہزاراں بندیاں نے رلت کیتی۔ ایرانی میڈیا دے مطابق سوگواران نے قاسم سلیمانی دی تصویراں والے پوسٹر تے ایرانی جھنڈے پھڑ رکھے سن۔ ایس دوران جنازے دے جلوس وچ بھج نس مچن تے دم گھٹن نال درجناں شرکاء جاں بحق تے زخمی ہو گئے۔ زخمیاں نوں ہسپتال منتقل کیتا گیا جتھے ایہناں نوں طبی امداد فراہم کیتی گئی۔ بعض زخمیاں دی حالت تشویشناک اے جہدی وجہ توں ہلاکتاں وچ وادھے دا خدشہ اے۔
