بے نظیر انکم سپورٹ پروگرام دے فنڈز وچ خردبرد، فرزانہ راجہ بذریعہ اشتہار طلب

اسلام آباد: احتساب عدالت نے بے نظیر انکم سپورٹ پروگرام دے فنڈز وچ خردبرد دے ریفرنس وچ سابق چیئرپرسن فرزانہ راجہ نوں بذریعہ اشتہار طلب کر لیا۔ عدالت نے فرزانہ راجہ دی عدالت حاضری توں چھوٹ دی عرضی رد کردیاں آکھیا جدوں توں ریفرنس دائر ہویا فرزانہ راجہ اک واری پیش نہ ہوئیاں، انج نہیں ہو سکدا اوہ بیرون ملک بیٹھی رہن اسیں چھوٹ دیندے رہیے۔ اسلام آباد دی احتساب عدالت دے جج سید اصغر علی نے بے نظیر انکم سپورٹ پروگرام وچ خردبرد دے نیب ریفرنس دی سماعت کیتی۔ عدالت نے سابق چیئرپرسن بے نظیر انکم سپورٹ پروگرام فرزانہ راجہ نوں اشتہاری قرار دین دی کاروائی دا آغاز کر دتا۔ عدالت نے فرزانہ راجہ دی عدالت حاضری توں چھوٹ دی عرضی رد کردیاں بذریعہ اشتہار اک مہینے دے اندر عدالت وچ پیش ہون دا نوٹس جاری کر دتا۔ عدالت نے آکھیا 24مئی تک فرزانہ راجہ پیش ہون نہیں تاں اشتہاری قرار دے دتا جائے گا۔