سرکار نےکورونا ایس او پیز اُتے عمل کروان لئی فوج سد لئی

اسلام آباد(پنجابی میڈیا گروپ) وزیراعظم نے آکھیا اے کہ فوج ایس او پیز پر عملدرآمد لئی پلس دی مدد کریگی۔لاک ڈائون نہیں کر رہے لوکائی نے احتیاط نہ کیتی تے سبھ کجھ بند کرنا پے گا۔ مثبت کیسز وچ اضافہ ہوندا رہیا تے ہسپتالاں اتے بوجھ ودھے گا۔ گھروں بار جاندیاں ہویاں ماسک استعمال کرو۔ قومی رابطہ کمیٹی برائے کورونادے اجلاس دے نال وزیراعظم نے اظہار خیال کردیاں ہویاں آکھیا اے کہ کورونا کیسز تیزی دے نال ودھ رہے نیں بوہت گٹھ لوکائی ایس او پیز اتے عمل درآمد کور ہے نیں۔شہری ماسک دا استعمال ضرور کرن۔ ماسک پہنن دے نال آدھا مسئلہ حل ہوجاندا اے۔ وزیراعظم عمران خان داآکھنا سی کہ بھارت وچ آکسیجن دی کمی ہوگئی اے۔ ساڈے ایتھے اوہ حالات نہیں جہڑے ہندوستان وچ نیں‘ بھارت ورغے حالات ہوگئے تے شہر بند کرنا پین گے۔ اوہناں نے مزیدآکھیا اے کہ مینوں لوکائی اج آکھ رہے نیں لاک ڈائون کردیو۔ لاک ڈائون ایس لئی نہیں کر رہیا واں کہ مزدور تے غریب طبقہ رل جاوے گا۔ ساڈی مساجد وچ ایس او پیز اتے عمل ہویا۔نیوز کانفرنس دے دوران وفاقی وزیر اسد عمرداآکھنا سی کہ پنج فیصد توں زائد کیسز والے علاقیاں وچ سکول بند کرن دا فیصلہ کیتا اے۔ ملک بھر وچ ساریاں مارکیٹاں شام چھ وجے تیک کھلن گیاں۔ ریسٹورنٹس وچ عید تیک ان ڈور دے بعد آئوٹ ڈورڈائننگ اتے وی پابندی عائد کیتی جارہی اے۔ آفس ٹائمنگ دو وجے تیک کیتی جارہی اے۔ لوکائی آخری دناں دا انتظار نہ کرن۔ عید دی تیاری کرن۔ دوجے پاسے معاون خصوصی ڈاکٹر فیصل سلطان نے آکھیا کہ پچھلے سال جدوں گرمیاں وچ کورونا دی پہلی لہر آئی تے ہسپتالاں وچ دبائو ودھ گیا۔ اسیں پچھلی کرونا دی لہر وچ مثبت کیسز دی شرح توں بوہت اوتے جا چکے آں۔ آکسیجن دے استعمال اتے دبائو زیادہ اے، اسیں 90 فیصدآکسیجن استعمال کر رہے آں۔

اپنا تبصرہ گھلو