ایس سال کنک وادھو ہوئے گی،عمران خان
ملتان ( پنجابی میڈیا گروپ )وزیراعظم عمران خان نے آکھیا اے کہ اج اجرا ہون والا کسان کارڈ پاکستان نوں تبدیل کردیوے گا،اج اسیں اوہ قدم چکیا جہڑا ثابت کرے گا کہ اسیں جدید زراعت ول جارہے آں۔ اسیں جدید زراعت ول ودھ رہے آں۔ کسان جتنا مضبوط ہووے گا۔ معیشت اتنی مضبوط ہووے گی۔ ساڈے کسان اج وی موئن جو دڑو والے طریقیاں اتے عمل کررہے نیں، کسان کارڈ دے اجرا توں ماڈرن ایگریکلچردے طرف جارہے آں۔ خوشی اے کہ پنجاب سرکار نے کساناں لئی انقلابی اقدامات کیتے۔ ملتان وچ کاشت کاراں لئی کسان کارڈ دے اجراء لئی منعقدہ تقریب دے نال خطاب کردیاں ہویاں وزیر اعظم داآکھنا سی کہ کسان پاکستان دی ریڑھ دی ہڈی اے ایس نوں جتنا مضبوط کراں گے اتنا اسیں اپنے ملک نو ںمضبوط کراں گے۔اوہناں نے تقریب دے نال خطاب کردیاں ہویاں آکھیا جیویں جیویں ٹیکنالوجی دے پاسے جاندے رواں گے کرپشن تھلے آئوندی روے گی۔ وزیراعظم عمران خان نے آکھیا کہ صرف ساڈے دور وچ کساناں لئی گندم دی امدادی قیمت وچ 500 روپے دا اضافہ ہویا جہدے نتیجے وچ کساناں دے کول 500 ارب روپیہ آیا۔عمران خان ہوراں نے مزیدآکھیااے کہ کساناں نوں ملن والی گندم‘ مونگی، مکئی تے دودھ دی قیمت دے نال کساناں دے کول اضافی 11 سو ارب روپے کساناں دے کول گئے نیں۔سبھ توں زیادہ غربت دیہاتاں وچ اے تے ایس طرحاں اسیں تخفیف غربت دے ہدف ول ودھ رہے آں۔





















