نیب اندر افسر فراڈ کررہے نیں تے چیئرمین چُپ کیتے ویکھ رہے نیں، چیف جسٹس پاکستان
اسلام آباد( پنجابی میڈیا گروپ)چیف جسٹس پاکستان جسٹس گلزار احمد نے ریمارکس دتے کہ نیب اندر افسر وڈے وڈے فراڈ کر رہے نیں تے چیئرمین نیب خموش نیں
چیف جسٹس پاکستان جسٹس گلزار احمد دی سربراہی وچ سپریم کورٹ دے فاضل بینچ نے نیب افسراں دی ملزماں توں رشوت لین اُتے دوبارہ انکوائری دے حکم دے خلاف نیب دی اپیل اُتے سماعت کیتی۔
چیف جسٹس نے استفسار کیتا کہ چیئرمین نیب تے سپریم کورٹ دے سابق جج رہے نیں، اوہ بغیر انکوائری کسی ملازم نوں کس طرح فارغ کرسکدے نیں۔ ڈپٹی پراسیکوٹر نیب عمران الحق نے موقف اختیار کیتا کہ اسسٹنٹ ڈائریکٹر فاخر شیخ تے ترویش دے خلاف انکوائری کیتی گئی، سندھ ہائی کورٹ نے3مہینے وچ دوبارہ انکوائری مکمل کرن دا حکم دتا سی۔
دوران سماعت چیف جسٹس نیب دے رویے اُتے برہم ہوگئے، اوہناں نے ریمارکس دتے کہ نیب اینج دے لوکاں نوں تنخواہ تے غلط کم کرن دا موقع وی دیندا اے، نیب وچ موجود ایسے افسرا وڈے وڈے فراڈ کر رہے نیں تے چیئرمین نیب خاموش نیں۔ نیب افسراں نوں ادارہ چلانا ہی نہیں آندا ، نیب دا ادارہ کیہ کر رہیا اے ، تماشا بنایا ہوئیا اے، نیب نے2مہینیدے کم لئی3سال لگا دتے،2018توں معاملہ چل رہیا اے اجے تک نیب توں انکوائری ہی مکمل نہیں ہو سکی۔





















