ساڈاانصاف دا نظام طاقتورنوںنہیں پھڑسکدا، وزیراعظم

لہور( پنجابی میڈیا گروپ) وزیراعظم عمران خان دا کہنا اے کہ پاکستان نوں اک چھوٹی جئی ایلیٹ کلاس نے اپنے قبضے وچ لیا ہوئیا اے، ساڈا انصاف دا نظام طاقتور نوں نہیں پھڑ سکدا۔
لہور پنجاب پیری اربن ہائوسنگ منصوبہ دی افتتاحی تقریب نال خطاب کردیاں وزیراعظم عمران خان ہوراں آکھیا کہ پوری دنیا وچ کورونا دی بیماری توں لوگ پریشان نیں، ساڈے پڑوسی ملک بھارت وچ کورونا پاروں لوگ سڑکاں اُتے مر رہے نیں، اسیں کورونا دی تشویشناک صورتحال توں لنگ رہے آں، کورونا دے پہلے دو فیز وچ اللہ نے بڑاکرم کیتا، کورونا دے حوالے نال اگلے2ہفتے ساڈے لئی بہت اہم نیں، ساہنوں کورونا کیس گھٹ کرن لئی ساریاں نوں ماسک پہننے ہون گے۔
وزیراعظم داکہنا سی کہ پاکستان نوںاک چھوٹی جئی ایلیٹ کلاس نے اپنے قبضے وچ لیا ہوئیا اے، جیل وچ صرف غریب لوگ جاندے نیں جناں کول وکیل لئی وی پیسے نہیں، جد کہ ساڈا انصاف دا نظام طاقتور ڈاکواں نوں نہیں پھڑ سکدا، طاقتورکرپشن دا حساب کتاب دین نوںتیارنہیں، پی ڈی ایم یونین این آراو مانگن لگی ہوئی اے، اسیں طاقتوراں نوں قنون دے تھلے لیانا اے ۔

اپنا تبصرہ گھلو